الأربعاء، 30 مايو 2012

معاملة اهل العريس ادخلى مش هتندمى

    

عشان نرتب افكارنا الاول هنقسم علاقتك بيهم لفترتين :
1- قبل الجواز (فترة الخطوبه)
2- بعد الجواز

وهنقسم اهله ل3 اجزاء :
1- حماتك
2- حماكي
3- اخواته البنات و الولاد

وقبل مانبدا فالكلام احب اقولكم نصيحه صغيره
بس صدقيني اهم حاجه لازم تعمليها

وهى انك زي ما بتعاملي اهلك
تعاملي اهل جوزك والعكس

يعني الاهتمام يكون واحد ماتهتميش بحد اكتر من التاني وفالغالب لو فيه فرق فالاهتمام هيكون لاهل جوزكلان الواحده بتقول عادي دي مامتي ده ببايا دول اخواتي مش مشكله مش لازم البيت يكون مترتب قوي مش لازم اعمل غدا جامد
طبيخ عادي وخلاص والحوارات دي
ومع اهل جوزها لازم يكون البيت زي المسطره
ولازم تعمل مليون صنف وصنف على الغدا ولازم تكون لذيذه طول ماهما موجودين
ولازم تبقى مهتمه بمظهراها 24 قيراط

وفرق المعامله ده بين اهلك واهل جوزك بيسبب مشكله كبيره
ومش هتعرفي تصلحيها مهما عملتي
والمشكله دي ان جوزك هيبدا مع الوقت مش يحترم اهلك
و هيقلل من قيمتك وكمان اهله هيكونو كده
هيخدو بقى فكره انك خايفه منهم وانك حاسه انهم الكل فالكل
وهيبدأو بالبلدي كده يركبوكي
ومش يهتمو بيكي وهتلاقي الكلام بقى بدا يتلئح
عليكي والحركات دي

فانت لاااااااااااااااااااااازم زي ما تعاملي اهل جوزك
تعاملي اهلك بالظبط ومايبقاش فيه اي فرق بينهم فالمعامله والاهتمام


نيجي بقى لموضوعنا وطرق المعامله مع اهل جوزك

اولا: فترة الخطوبه

1- معاملتك لحماتك:


بصي بقى ياستي حماتك دي هتكون زي مامتك بالظبط
تحترميها وتحبيها وتعامليها زي ما بتعاملي مامتك
يعني تتطمني عليها تسالي عنها تجبلها هديه فالمناسبات على الغدا
لو تعبانه تزوريها وتاخدي معاكي حاجه حلوه او بوكيه ورد
و صدقيني الحاجت البسيطه دي بتاثر جامد فطريقة معاملتها ليكي

وانا هقولك طريقه حلوه تخليكي على طول تسالي عليها
عشان الوقت مش ياخدك وتلاقي الايام والاسابيع عدت
وانت حتى مش كلمتيها فالتليفون

- انت امسيكي موبيلك واعملي رسالة تذكر
فالوقت اللي يكون مناسب ليكي وليها مثلا الساعه 8 بليل
واكتبي فيها اتصلي بطنت فلانه والرساله دي كرريها كل يومين او تلاته
واما الموبيل بتاعك يرن بالرساله دي
تسيبي اللي فاديكي وتكلميها ومش هقولك ارغي معاها
انت بس اتصلي واقوليها الو ازيك حضرتك ياطنت اخبارك ايه
واخبار صحتك مش عايزه حاجه سلمي على عمو وفلان وفلان
اخوات خطيبك يعني وحماتك بس واقفلي مش هتاخد منك 3 دقايق
و هتسيبي عندها انطباع كويس جدا وهتحبك زي بنتها وكمان صلتك بيها هتزيد
وهتبداي تتعودي عليها وحاجز الرسميات هيتكسر بينكم
وهتبداي مع الوقت تحسي فعلا انها قريبه منك
بس تبقى تتصلي بيها مخصوص مش مثلا تكوني
بتكلمي خطيبك وتقوليله هات طنت اسلم عليها

- تاني حاجه الزيارات
لازم تزوريها كل اسبوع او اسبوعين وتاخدي معاكي حلويات هديه ليها هى
او للبيت مثلا صنية تقديم طقم كوبايات شاي حاجه كده مش هتكلفك اكتر من 30ج
ومش لازم كل مره تاخدي حاجه يعني بس طبعا اول مره لازم تاخدي فايدك هديه محترمه
بعدين فوتي مرتين كده وهاتيلها حاجه وكده يعني

- تالت حاجه العزومات
يعني تعزميها مره فالشهر مثلا حسب ظروفك يعني وتكوني انت طابخه الاكل او على الاقل عامله صنف واحد بنفسك لان ده هيدل على اهتمامك بيها وهيزود حبها ليكي

2- معاملتك لحماكي :

عادة الراجل ده بيكون غلبان يعني ومش بياخد حقه فالمعامله لان طبعا الكل بيهتم بالحما و ينسى الراجل الغلبان ده فانت برده لازم تكلميه وتسالي عليه ولو محروجه منه على الاقل ابعتيله السلام مع حماتك
وممكن تبقي تقوليلها اديهولي اسلم عليه كده كل مرتين تلاته تتصلي بيها وطبعا فالمناسبات تجبيله هديه يعني تعرفي عيد ميلاده امتى ممكن لو بيحب حاجه معيه فالاكل او الحلويات يعني تخديها معاكي وانت رايحه وقوليله انا عرفت من فلان اللي هو خطيبك ان حضرتك بتحب كذا فجيبهولك مخصوص كلمتين من دول برده حلوين ومش هيخسروكي حاجه بالعكس هيقربك منهم اكتر

3- معاملتك لاخوات خطيبك:

انتبهي ان ساعات اخت الزوج بتكون اصعب من الحما حتى لو كانت
قدك فالسن فانت بقى لو عنده اخوات بنات لازم تكلميهم كتير وترغي معاهم كمان
ولو نازله مثلا تشتري حاجه قوليلها ماتيجي معايا يا فلانه او تتصلي بيها
تقوليلها ماتعرفيش محل كويس بيبيع كذا وتحاولي تستشريها

لان بجد لو كسبتي اخت خطيبك فصفك هتبقى هى محامي الدفاع عنك
لو حصل مشكله لا قدر الله وتخلي ديما فيه صله بينكم واعتبريها واحده صحبتك
ولو خطيبك دايقك فحاجه اتصلي بيها قوليلها شوفي اخوكي عملي ايه بهزار كده
واحكيلها واشكيلها عن اللي بيديقك وهتلاقيها هى بقت
تقوله ايه ياعم مدايق فلانه ليه ولا مثلا ماتعملش كده تاني
عشان خطيبتك بتزعل وهتكون فصفك وهتدافع عنك فغيابك
لو عرفتي فعلا تكسبيها زي ما بقولك كده

بالنسبه بقى لاخواته الولاد
لازم طبعا يكون فيه حدود بالذات لو كانو شباب مش اطفال يعني
اه تكوني لذيذه وكل حاجه بس برده فحدود لان الرسول عليه الصلاة والسلام
حذر من اخو الزوج بس انا مش فاكره نص الحديث بس فيما معناه
انك تاخدي حذرك منه لان فالغالب بتعامليه زي اخوكي وممكن تقعدي قدامه بشعرك
مثلا وانت حاطه ميك اب والكلام ده على اسا انه مش غريب يعني
بس انت ماتعرفيش النفوس فيها ايه فانت تكون كويسه معاهم ولطيفه بس
تاخدي بالك من الحاجات الصغيره دي
ومش بقولك البسي الوش الخشب قدامه بس يعني خليكي وسط
لا سايبه قوي ولا مخشبه قوي

 


المتابعون

شارك

Twitter Delicious Facebook Digg Stumbleupon Favorites More